【娛樂熱話】《2024 香港小姐競選》外景拍攝第 2 批佳麗赴塞班島拍攝泳裝上陣親親魔鬼魚

《2024 香港小姐競選》15 強外景拍攝已經陸續展開，第二批候選佳麗 7 號秦冀雯（Yvonne）、 8 號盧凱怡（Kerry）和 12 號鍾翠詩（Tracy）日前已出發到塞班島，並由兩位師姐馮盈盈及麥美恩（Mayanne）帶領進行外景拍攝。

細膽麥美恩嚇到尖叫
三位佳麗昨日（7 月 22 日）行程非常豐富，一大清早便出發沙灘拍攝泳裝鏡頭，之後在兩位師姐陪同下，齊齊與魔鬼魚作零距離接觸。以水着上陣的三位佳麗大晒健美身材，與魔鬼魚抱抱兼餵牠們吃東西，玩得不亦樂乎。兩位師姐亦有落場玩埋一份，Mayanne 全程表現勁騰雞，拍攝期間有一條魔鬼魚在其腳邊游過，Mayanne 即時嚇破膽，露出痛苦表情包，場面搞笑。有指親親魔鬼魚會幸運 7 年，三位佳麗和盈盈聽畢都爭住錫，而細膽的 Mayanne 為了 Good Luck，最終亦鼓起勇氣錫錫魔鬼魚。

盧凱怡硬食苦瓜全餐
盈盈、 Mayanne 與三位師妹共晉午餐期間亦發生搞笑事，事緣三位佳麗根據自己口味選擇了自己喜歡的菜式，口味比較獨特的 Yvonne 竟揀選了苦瓜全餐，就連飲品都是苦瓜汁。之後因為製作組安排，兩位師姐需根據對三位師妹的第一印象為三人分配菜式，結果 Kerry 被安排品嚐苦瓜全餐，雖然「苦過 Dee Dee」，但 Kerry 仍一邊吃一邊露出甜美笑容，相當專業。
三位佳麗與盈盈、 Mayanne 一同受訪，講到是次拍攝泳裝事前有否做好準備？Kerry 說：「我哋從參選開始一直都有 Keep fit，每個人都好勤力，我發現 Tracy 同 Yvonne 都食得少過我。」盈盈聞言大爆 Yvonne 非常自律，就連飛機餐都親自準備，Yvonne 笑言：「我好聽話架，大家都叫我減吓肥，因為上鏡會好睇啲。」Tracy 則指不擔心拍泳裝鏡頭，「但我都會食少啲，因為怕有肚腩。」

鍾翠詩爆師姐多嘢講
至於師姐級的 Mayanne 則搞笑說：「咁想睇我哋着泳裝咩？有咩好睇，十幾年前咪着過囉！」盈盈笑言：「都有做啲準備，但全部（泳衣）都係好運動型，唔會走光，好安全。」Mayanne 聞言，搞 Gag 謂：「我帶咗我媽套泳衣嚟，簡稱面堅尼，由頭遮到尾，美白好緊要呀！」Mayanne 和 Tracy 同樣來自溫哥華，問到有否經驗分享給師妹？Mayanne 說：「其實我已經變咗一個港女，你（Tracy）
Feel 唔 Feel 到我仲有溫哥華特質？」Tracy 言明明想向師姐笠高帽，但卻被其餘四人誤解為爆 Mayanne 多嘴，場面搞笑。 Tracy 其實是這樣說的：「有（溫哥華特質）呀，就係好多嘢講，可以有好多話題，呢樣好好。」